من زمان وانا باسمع التعبير ده من ناس كتير لكن عمري مافهمت معناه غير لما جربت الاحساس بالغربه وعرفت معناها.
اكتر وقت تحس فيه بالغربه لما تسمع ان واحد كنت اعز اصدقاءه و عشتو مع بعض ايام الطفوله والصبى و لك معاه ذكرايات كتير لما تسمع انه اتجوز او خطب او لا قدر الله عمل حادث او مات من كام شهر وانت متعرفش. تحس انك ميت ومالكش وجود.
أو لما تسمع ان حد من اهلك في مشكله انت كنت بتقف جنبه لما يمر بيها وتساعده وتكون سنده , ودلوقتي حتى ممكن متعرفش تكلمه بالتلفون وهتقول ايه مافيش في ايدك شيء تعمله وهو هيقدر كده بس ده مش هيعفيك من الاحساس بالالم والغربه وانك عاجز تساعد اقرب الناس ليك. وحالات كتير تحس فيها بانك عاجز و ميت وده احساس مر جدا.
وأصعب شيء ويمكن ده مصدر الاحساس بالغربه. إنك تحس إنك اتنسيت كأنك مكنتش موجود.
من الاجراءات اللي بنعملها لما نسافر اننا نعمل تصريح سفر من الجيش علشان يشيلو اسمك من كشوف الاستدعاء لو حصلت حرب.
بس اللي هتكتشفه بعدين ان اسمك اتمسح من كل الكشوف. أهلك وجيرانك وأصحابك و حبيبك وناس كتير كانو فاكرينك ولما تحصل عندهم اي مناسبه بتكون من ضمن المدعووين. مع الوقت هتتمسح من قوائم اتصالاتهم و ملامحك هتتمسح من ذاكرتهم وقليل منهم اللي هيفكر فيك ويسأل عنك.
انا مش طول الوقت بافكر بالشكل ده , بس ده احساس بيزيد و يقل على حسب المود وفي نفس الوقت بدأت اخد على كده. بس ده لا يعني اني هاحب الاحساس ده.
باتمنى اي واحد عايز يسافر ويبعد عن بلده يفكر كويس ويحسبها علشان لو معندوش هدف قوي يصبره على مرارة الغرب وفراق الاهل والاحباب هتكون صعبه جدا عليه.
